कुंकवाचा धनी गेला अन् तासाभरात कारभारणीनंही साेडला प्राण
By लोकमत न्यूज नेटवर्क | Published: November 30, 2021 02:27 PM2021-11-30T14:27:03+5:302021-11-30T14:29:14+5:30
आटपाडी : कुंकवाचा धनी गेला अन् कारभारणीला धक्का बसला! पतीच्या निधनानंतर आता आपण कुणासाठी जगायचं म्हणत अवघ्या तासाभरात पत्नीनेही ...
कुंकवाचा धनी गेला अन् तासाभरात कारभारणीनंही साेडला प्राण
Next आटपाडी : कुंकवाचा धनी गेला अन् कारभारणीला धक्का बसला! पतीच्या निधनानंतर आता आपण कुणासाठी जगायचं म्हणत अवघ्या तासाभरात पत्नीनेही प्राण सोडल्याची घटना आटपाडीत घडली. या आजी-आजोबांच्या एकत्रित जाण्याने सगळ्या आटपाडीकरांनी हळहळ व्यक्त केली. काशिनाथ शंकर ऐवळे (वय ८५) आणि वैजयंता काशिनाथ ऐवळे (वय ८०) अशी या आजी-आजोबांची नावे आहेत.
आटपाडीतील विठ्ठल-संपतनगर येथे ऐवळे कुटुंब राहते. दि. २८ नोव्हेंबर रोजी सायंकाळच्या दरम्यान काशिनाथ शंकर ऐवळे यांचा वृद्धापकाळाने मृत्यू झाला. त्यांच्या मृत्यूचा धक्का सहन न झाल्याने पत्नी वैजयंता काशिनाथ ऐवळे यांनीही तासाभराच्या अंतराने प्राण सोडले. या दु:खद घटनेने परिसरामध्ये हळहळ व्यक्त होत आहे. काशिनाथ व वैजयंता यांच्यावर आटपाडी येथील स्मशानभूमीत अंत्यसंस्कार करण्यात आले. त्यांच्या पश्चात दोन मुले, मुलगी, सुना, नातवंडे असा परिवार आहे.
कुटुंबीयांना धक्का
ऐवळे दांम्पत्याचे असे अचानक निधन झाल्याने कुटुंबियांवर दु:खाचा डोंगर कोसळला आहे. कुटुंबियांसह नातेवाईकांना धक्का बसला आहे.