लष्कर-ए-तैयबाच्या नेटवर्कचा पर्दाफाश, 5 दहशतवाद्यांना अटक; हिजबुल कमांडर ठार
By ऑनलाइन लोकमत | Published: November 21, 2021 08:59 AM2021-11-21T08:59:17+5:302021-11-21T09:01:56+5:30
दहशतवाद्यांकडून शस्त्रास्त्रे आणि दारुगोळा यासह घातक साहित्य जप्त करण्यात आले आहे.
लष्कर-ए-तैयबाच्या नेटवर्कचा पर्दाफाश, 5 दहशतवाद्यांना अटक; हिजबुल कमांडर ठार
Next श्रीनगर:जम्मू-काश्मीरमध्ये सुरक्षा दलाना मोठे यश मिळाले आहे. पुलवामा पोलिसांनी, दक्षिण काश्मीर जिल्ह्यातील अनेक ग्रेनेड हल्ल्यांशी संबंधित प्रकरणांचा तपास करत असताना दहशतवादी संघटना लष्कर-ए-तैयबाच्या सक्रिय सहकार्यांचे नेटवर्क उघड केले. पोलिसांनी तपासादरम्यान पाच दहशतवाद्यांना अटक केली आहे. शौकत इस्लाम दार, एजाज अहमद लोन, एजाज गुलजार लोन, मंजूर अहमद भट आणि नसीर अहमद शाह अशी त्यांची नावे आहेत.
प्राथमिक तपासात असे दिसून आले आहे की, हे मॉड्यूल स्लीपर सेल म्हणून काम करत होते आणि शस्त्रास्त्रे आणि दारुगोळा खरेदी तसेच वाहतुकीमध्ये गुंतले होते. त्यांच्या पाकिस्तानी आकाच्या सांगण्यावरुन सुरक्षा दलांवर झालेल्या अनेक ग्रेनेड हल्ल्यांमध्येही त्यांचा सहभाग होता. त्यांच्याकडून शस्त्रास्त्रे आणि दारुगोळा यासह घातक साहित्य जप्त करण्यात आले आहे. या प्रकरणी काकापोरा पोलिस ठाण्यात संबंधित कलमांखाली गुन्हा दाखल करण्यात आला आहे.
कुलगाममध्ये हिजबुल कमांडर ठार
जम्मू-काश्मीरच्या कुलगाम जिल्ह्यात सुरक्षा दलांशी झालेल्या चकमकीत हिजबुल मुजाहिद्दीनचा नवनियुक्त जिल्हा कमांडर शनिवारी ठार झाला. दक्षिण काश्मीरच्या अश्मुजी भागात दहशतवादी असल्याच्या गुप्त माहितीवरून सुरक्षा दलांनी परिसराला वेढा घातला आणि शोध मोहीम सुरू केली, असे पोलिस प्रवक्त्याने सांगितले.
दहशतवाद्यांनी अंदाधुंद गोळीबार केला
ऑपरेशनदरम्यान दहशतवाद्यांना आत्मसमर्पण करण्याची भरपूर संधी देण्यात आली होती, त्याऐवजी त्यांनी अंदाधुंद गोळीबार करण्यास सुरुवात केली. सुरक्षा दलानेही प्रत्युत्तर दिले. यात हिजबुल मुजाहिद्दीनचा नवनियुक्त जिल्हा कमांडर मुदासीर वाजे चकमकीत मारला गेला. तो कुलगाममधील मालवानचा रहिवासी होता.